《神萊之筆》角色，身份大轉變

角色、身份大轉變

夏天伊始，參加咗「加家有球」青少年足球訓練課程，今次唔單止拍攝，我仲穿上放低咗好多年嘅波缽，幫主教練「左腳」做助教 (好彩冇阻手阻腳)。

我同左腳 – 黃慧聰 – 有幸相識超過廿年，一開始喺球場認識一齊踢波，然後去到電台一齊工作，再到各自組織家庭，睇住大家喺事業上奮鬥嘅一個好朋友。

今次，望住一班由八歲到十二、三歲嘅小朋友喺綠茵場上面你追我逐，令我諗返起自己大概都係由十歲開始，喺香港參加每個暑假都會舉辦嘅「全港青少年足球訓練計劃」。

當年嘅我冇乜經驗，不過足球就係咁，你唔踢過就唔會有進步，所以我好支持呢個青少年足球訓練計劃。我絕對相信，小朋友應該由細開始培養對足球嘅興趣；老土啲講，好似足球小將嘅主角「戴翅偉」一樣，將足球變成你嘅朋友，你嘅朋友先會聽你支笛任你舞!

主教練「左腳」@「加家有球」青少年足球訓練課程

將足球變成朋友

今次參加者大部分嚟自香港嘅新移民，剛抵埗，唔好話踢波，可能連講廣東話嘅朋友都冇乜幾個。教練團開心嘅係，見到好幾位有潛質嘅小朋友，但更重要就係透過足球活動令佢哋身心同社交得到正面發展。

小朋友需要有一個學習對象，以前細個睇波我哋都會有足球偶像，我鍾意當年一個扭六個嘅馬勒當拿、西德嘅列巴斯基、馬圖斯、英國嘅華度、笠臣、班尼斯、意大利嘅巴治奧等等…如果你問而家嘅年青人嘅足球偶像，相信好多人都會講係C朗拿度同美斯。所以，千祈唔好睇少一個足球明星嘅影響力！

掛咗靴十幾年嘅我，近呢一兩年開始發現能夠轉換身份成為年青人嘅教練(coach)或者導師(mentor)，比起自己真正落場嗰種滿足感可能仲要大！

波係圓嘅，人生都係一個圓

如果可以嘅話，我好希望左腳呢個「加家有足球」青少年足球計劃可以繼續舉辦落去，我絕對願意同你嘅仔女分享我喺足球場上面嘅經驗。波係圓嘅，人生都係一個圓，喺足球場上可以學到好多人生哲理，學習人生。落場經歷過嘅，總好過坐喺場邊或者睇住電視機說三道四，「得把口」。

就睇吓你喺九十分鐘入面可以袋到幾多落袋啦!

最近，馬來西亞歌手黃明志嘅一首歌令我好有共鳴同埋感觸。除咗MV嘅拍攝手法、剪接、取景做得非常出色之外，作為2022年世界盃其中一首華語主題曲，呢首歌能夠完全將足球變成生活嘅一部份，因為足球，就好似每一日嘅營養補充劑，生命食糧！

泰萊
弍零弍弍年伍月弍拾柒日 第壹筆完