fbpx
專欄

《神萊之筆》快樂足球 – by 泰萊

今年我八歲個仔都開始參加地區嘅足球訓練,呢個年紀係享受球場上快樂足球嘅時光。作為家長,喺場邊我見到有好幾位父親帶咗佢哋嘅兒子嚟到球場觀看球賽,當見到自己嘅小朋友跌低嘅時候,佢哋都會神情緊張...

快樂足球

足球呢樣嘢真係好奇妙!佢嘅魔力係能夠延伸好幾代人。

話說上一回提到我自己十歲嘅時候開始參加全港青少年足球推廣計劃,展開我嘅足球路。回想返十歲之前嘅我又點樣開始接觸足球嘅呢? 我諗大概係因為我嘅大哥,佢比我年長好幾歲,喺我讀小學嘅時候,佢已經係中學嘅校隊。屋企裏面有好幾件球衣,當年嘅球衣唔係啲乜嘢大牌子或者出名嘅足球隊嘅球衣,但對於背後有數字嘅衫我開始有一種狂熱嘅迷戀。

意大利金童 – 巴治奧

《足球冷知識》球員球衣背後除咗號碼之外係冇球員名字! 嘅直到1994年世界美國世界盃。北美傳統四大運動都有球員名字喺球衣背後,所以就將呢一個文化傳到落足球場上,從而大家可以開始見到足球員嘅姓氏出現喺球衣嘅背後。有咗足球員嘅名字之後,嗰件波衫個意義就更加大 – 代表一個傳奇,代表一個年代。

嚟咗加拿大之後,參加咗華人業餘足球聯賽,雖然球衣背後未有自己嘅名字,但係對於能夠穿上有會徽嘅球衣,就有一種使命同責任感。

科技先進,社會嘅發達,我哋而家往往可以喺網上訂購自己心愛嘅球隊嘅波衫,印上自己喜歡嘅名字同號碼! 當然我自己都有咁做,為我嘅仔女買咗一家同款同色嘅球衣,甚至變為潮流時裝。

Timbits Soccer Calgary
我著十號

今年我八歲個仔都開始參加地區嘅足球訓練,喺佢呢個年紀,喺球場上本應係享受快樂足球嘅時光。作為家長,喺場邊我見到有好幾位父親帶咗佢哋嘅兒子嚟到球場觀看球賽,當見到自己嘅小朋友跌低嘅時候,佢哋都會神情緊張; 當自己嘅小朋友攔截成功嘅時候,佢哋都會開心雀躍; 當自己小朋友射入波嘅時候,更加歡喜若狂,好想衝出球場同佢哋擁抱!

攻呀攻,快搶攻

足球雖然係一個好簡單嘅球體,但佢嘅魔力真係難以用筆墨形容! 見到因為一個足球令到家長同孩子多咗一種溝通嘅話題,孩子能夠走出戶外,雙腳接觸草地,皮膚感受風同陽光,總好過坐喺冷氣房閂埋窗簾對住個螢光幕打遊戲機! 而作為其中一位助教,我好希望小朋友能夠從小打好根基,由最基本嘅技術開始。你要享受足球畀你嘅快樂,首先你要認真對待呢一種快樂! 冇一種快樂係會因為你唔認真而長久嘅。

無論踢嘅、睇嘅同教嘅,我都希望大家能夠享受足球帶畀你嘅快樂,共勉之。

泰萊
弍零弍弍年陸月叁日 第弍筆完

Timbits Soccer Calgary

Leave a Reply

%d bloggers like this: