回到過去，歷史會重來？
2022年卡塔爾世界盃如箭在玄，各路精英蓄勢待發!身在加拿大嘅我當然為到加拿大男子國家隊闊別世界盃三十六年而再次入圍感到萬分興奮。
世界盃期間不乏精采嘅廣告，最近睇到一則快餐店嘅廣告，廣告入面嘅男主角食咗一啖漢堡包之後可以穿越時空，分別回到2002年日韓世界盃見到中學時代嘅女神要搬屋、2014年巴西世界盃重遇女神但佢已經名花有主，仲有今年嘅2022年卡塔爾世界盃，佢終於可以見返當年嘅女神!當然廣告嘅橋段係天馬行空，無可能喺現實發生但係我哋又試幻想一下，如果呢一刻我哋能夠穿越時空返去過往世界盃嘅歷史性時刻，有邊幾個重要moment喺你心目中係你好想回到過去嘅呢？
等泰萊又幻想下，自己咬第一口漢堡包，帶我返去1986年墨西哥世界盃! 當年可以話係自己有記憶以嚟第一次睇嘅世界盃，見到馬勒當拿嘅「上帝之手」令阿根廷領先，之後佢一個扭六個，殺入英格蘭嘅禁區，射入施路頓嘅五指關! 如果你喜歡馬勒當拿嘅話，你會話佢係英雄，因為佢嘅機智，騙過咗未有VAR嘅足球裁判! 之後帶領阿根廷國家隊棒走當年嘅世界盃冠軍;唔喜歡佢個人話佢勝之不武，話佢係「狗雄」! 無論如何，喺阿根廷國家隊嘅波衫上面已經綉上兩粒金星係不爭嘅事實，佢成為阿根廷國家嘅英雄呢一點直到呢一刻阿根廷嘅超級球王美斯都未能攀過「老馬」嘅成就! 今屆可能係美斯最後一屆出現喺世界盃嘅舞台，就睇下佢有無咁嘅機智能力帶領阿根廷直闖決賽攞走大力神盃。
但係作為家長，我哋點樣教導孩子喺運動場上點樣發揮體育精神之餘又要擁有呢啲小機智又不失大將之風呢？如何取得平衡真係上帝先知道! 當然能夠真真正正用自己嘅實力擊倒對手才可以配得光榮。有人睇事情重視結果; 有人睇事情重視過程，沒有真正對與錯!
等我咬第二啖漢堡包，讓時間帶到去2002年日韓世界盃! 當年我和左腳喺中文電台工作，正值日韓首度合辦，間接令中國隊首次闖入世界盃嘅舞台。當時好多華人都為之興奮，但最可笑嘅係當中國對巴西嘅時候，一向擁戴巴西嘅香港人都係一面倒支持巴西隊而非中國隊。當時真心感覺有啲奇怪，一個國家嘅人民理應支持自己嘅國家，但唯獨香港呢個彈丸之地從來沒有根嘅地方，香港人喜歡巴西足球嘅華麗，亦愛傳統嘅英格蘭因為有情意結，當然亦有各自嘅德國、意大利或西班牙等球迷，各適其適。作為球迷，我最擁戴嘅就係懂得欣賞足球，熱愛足球嘅球員為我帶來嘅所有嘅快樂! 就好似當年我哋同一家酒家舉辦嘅通宵睇波團，呢個可以話係喺卡城華人圈子裏面嘅創舉! 仲係好記得喺凌晨嘅時間同大家食住點心玩住遊戲睇住波，一大班人一齊歡呼一齊叫喊，真係移咗民咁多年之後都未曾有過嘅睇波經驗! 能夠寓工作於娛樂，可謂人生一大快事，夫復何求!
讓我咬第三口漢堡包將時間帶到去2006年，我哋移師到去更加大嘅場地，相約超過300名球迷喺一家賭場酒店入面一齊欣賞世界盃決賽，由意大利對法國! 當年嘅法國擁有施丹、亨利、皮里斯、巴夫斯等等猛將，意大利亦用咗一貫嘅作風穩打穩紮一直殺入決賽。最令人印象深刻及驚訝嘅一幕出現喺加時嘅時候，施丹竟然做出一個無球喺腳下時用頭槌攻擊意大利後為馬特拉斯嘅心口，令對方即時跌倒而直接被紅牌趕出場! 仲記得當時喺現場好多球迷都「嘩!」咗出嚟，唔知發生咩事，點解施丹會控制唔到自己嘅情緒，喺世界盃決賽呢個大舞臺上做出咁令人難以相信嘅動作。根據之後嘅報道，意大利後為馬特拉斯可能喺施丹耳邊講咗啲侮辱佢屋企人嘅說話而令佢大發雷霆，火遮眼用頭槌報復! 呢啲所謂trash talk嘅戰術就令意大利笑到最後。意大利係唔係勝之不武？係咪施丹EQ有問題？ 種種嘅「馬後炮」評論已經唔再重要，呢個已經成為歷史嘅一幕。人類總係重複犯相同嘅錯誤! 歷史永遠都係會將人類嘅過犯記得一清二楚，就好似列卡特向禾拉吐口水、碧咸以虎尾腳向施蒙尼報復、巴治奧十二碼宴客等等等等……然而之後幾屆嘅世界盃因為技術嘅提升，球員喺球場上嘅一舉一動都可以喺鏡頭前表露無遺，相對地較明顯或粗嘢嘅動作已經好少喺世界盃嘅大舞臺上面發生，我哋亦唔希望球員們教壞細路呢!
講返2022年嘅今日，世界盃首次喺中東地方嘅年尾11月冬天舉行都係一個創舉，雖然反對嘅聲音此起彼落，但係事實上世界盃將會如期舉行，我哋盼望加拿大男子足球國家隊可以作出零的突破，我自己要求唔多，我希望佢哋能夠最少射入一球兼攞一份我覺得已經對國家有所交代。今年會唔會有令球迷難忘的一幕，例如第五次參加世界盃嘅美斯之前已經踢咗19場賽事，今屆作為「最後探戈」嘅佢若果能夠再次率領阿根廷打入決賽，咁冠軍戰就會係佢個人職業生涯嘅第1000場上陣比賽，喺12月18日決賽之後就自有分曉嘞。
泰萊
寫於弍零弍弍年拾壹月拾陸日
