加拿大國家足球隊嘅三場世界盃分組賽賽事已經完滿結束。雖然戰果令人失望但總算比起1986年果一屆有進步，入咗兩球但依然未有分數。大家要等多四年去到下一屆美國、墨西哥同加拿大聯合舉辦嘅世界盃決賽週，睇吓加拿大會唔會藉著三分之一個主場之利喺未來呢四年裏邊可以培育到更加多嘅新血，吸收今年嘅經驗，連續兩屆進身世界盃決賽週，希望藉著主場球迷支持，可以攞返啲好成績。
其實今屆加拿大隊開咗個好頭，喺強攻之下表現力壓比利時，最終不幸地只係輸0比1，一眾球迷滿以為加拿大喺第二場可以有更加好嘅表現，誰不知佢哋嘅教練John Herdman一句大言不慚嘅說話，唔單止冇風度、冇尺度(講粗口)亦都冇深度咁樣挑起一眾克羅地亞球員和球迷嘅情緒，結果變成加拿大世界盃歷史裏面被入球最多嘅一場賽事。
最後一場可以話係例行公事對著摩洛哥，全場三個入球都係嚟自摩洛哥嘅球員，其中一球係擺烏龍送畀加拿大嘅。唔緊要啦! 反正都係加拿大龍門一開波三分鐘就已經送咗一球被對方「笠死」，叫做禮尚往來啦。
有人用雖敗猶榮嚟形容加拿大今次喺卡塔爾世界盃之旅，筆者認為可能大家抱住身為加拿大人嘅心態去包容咗佢哋今次一厥不振嘅表現。佢哋喺外圍賽差不多不敗嘅表現全因為對手實力太弱，當出到去同其他世界級嘅歐洲、非洲國家相比，實力始終差一大截，佢哋今年嘅成績只係喺32隊裏面緊緊好過主辦國卡塔爾排喺第31咋。
最近追緊一套關於拳擊運動嘅電視劇，主角係人氣男團嘅成員，當中亦有老戲骨同出色嘅演員。戲入面嘅拳館老闆曾經講過:「拳擊運動員嘅榮耀係你知對手嘅認同、觀眾嘅喝采聲，就算最後死喺擂台上面，嗰一刻嘅佢已經成為香港拳壇嘅傳奇。」 Alphonso Davies可以係一個傳奇，但喺北美又有幾多個父母能夠放手比自己嘅小朋友從小到大攞住個足球任佢由朝玩到晚，向自己嘅夢想逐步逐步進發呢? 希望佢哋吸收咗今次嘅教訓好好做好青訓嘅工作，咁樣加拿大嘅足球運動先至有發揚光大嘅一日。
睇世界盃除咗睇波之外其實真係有好多嘢睇。我哋見到阿根廷球王美斯喺第二場分組賽射入第一球嘅時候激動落淚，日本球迷嘅精心打扮，德國隊全隊「矇著嘴唔妥你」影合照，加上一地都係眼鏡說就知道有幾多人今年跌曬眼鏡。
唔知係咪巴西嘅一貫大熱作風令佢哋冇乜閃失反而令佢哋冇乜欣賞度可言(除咗一球「車」身倒掛)。法國夾著衛冕冠軍之名，三場分組賽顯示了巨大嘅實力，睇嚟去到淘汰賽只有佢哋嘅對手會被睇低一線。有著C朗拿度率領嘅葡萄牙亦順利躋身16強，葡萄牙要再走遠啲嘅話絕對唔可以依賴C朗一人。
可能加拿大呢邊天氣凍，足球運動始終未能夠和冰球、籃球等運動相提並論。就今次世界盃而言，市面上比起四年前少見咗好多唔同國家嘅球迷插著國旗支持自己喜愛嘅球隊，如果你本身唔係球迷你根本冇可能察覺到一個全球超過十億人睇緊嘅世界盃原來進行緊，加拿大卡加利呢度就比較冷清，可能各家都掛住掃門前雪吧!
