世界盃曲終人散，美斯完美封王! 喺剛剛過去嘅週末大家目睹世界盃總決賽阿根廷點樣喺驚濤駭浪之下以互射十二碼險勝法國，一眾阿根廷小將為美斯鋪橋搭路，寫下佢職業足球生涯裏面夢寐以求嘅冠軍寶座。從各大媒體都已經聽到、睇到、讀到唔少文章都將美斯嘅足球夢一一細緻地一而再、再而三咁回顧，見證佢點樣成為當今足球場上無與倫比嘅真正球王。
筆者亦都唔打算喺度跟人口水尾，但我想講嘅係美斯能夠「登基」，除咗因為佢真係一位天才之外，後天有一樣嘢唔係每一個足球員都能夠做到嘅，就係「專一」。有前輩曾經講過一句說話:「當你專一咁做好一件事，哪怕嗰件係一件微不足道嘅事，只要你不斷地、重複地做好佢，你就會成為嗰件事嘅專家!」美斯佢一出世就非常專一地踢足球，專一地只有一個夢想; 就係要舉起世界盃冠軍，九歲嗰一年亦都專一地對佢嘅初戀女朋友一見鍾情。所以美斯能夠成為「閱讀球賽」嘅專家!
大家睇波嘅時候有冇睇到啲花邊新聞？通常都會落到球員身邊嘅女友太太團(WAGs)，但今年最矚目最搶風頭最多媒體報導嘅相信都係美斯太太Antonella Roccuzzo。相比起其他名模女友，美斯嫂非常低調，每次喺球場上見到佢都係著住阿根廷球衣，沒有千萬首飾，亦不是珠光寶氣，但支持國家隊之情可見一斑。自從同美斯結咗婚之後一直相夫教子，做「跟得夫人」。當然做得美斯既賢內助唔需要再出嚟拋頭露面打工咁辛苦，佢只係喺西班牙擁有一間鞋店，得閒先出去打理一下業務，其餘時間都見佢同美斯周圍飛，同時和三個仔享受家庭樂，令美斯無後顧之憂地專心喺球場上馳騁。
美斯唔單只係年青球員嘅典範，佢更加係一眾爸爸嘅典範，點解咁講？ 因為美斯能夠用身教去影響佢嘅孩子。喺世界盃冠軍頒獎禮之後見到最多嘅美斯嘅相片就係佢擁抱住佢人生兩個最愛嘅相片，佢用行動佢話畀佢嘅兒子聽，就算爸爸贏咗世界盃冠軍，佢第一時間都最想同身邊最親嘅老婆去分享。將辛辛苦苦贏返嚟嘅世界盃冠軍獎座交到老婆手中，幫老婆打卡，一齊分享喜悅!
令我突然間諗返自己過往喺工作嘅地方都贏過一啲獎項，但當我攞到獎之後好少會同我嘅仔女分享我嘅喜悅。其實當孩子見到父親努力咁樣為咗目標不顧一切地奮鬥已經係一個好難得嘅榜樣，我自己都應該好好學習，學習同孩子分享自己喺工作上嘅喜怒哀樂，等佢哋知道爸爸都有困難嘅時候，爸爸都有失敗嘅時候，但係我哋都要學習點樣喺失敗裏面成長，點樣改善自己嘅缺點，點樣為到目標而奮鬥。
媒體上曾報導美斯寫過一段情話畀佢老婆，「輸掉比賽常常令我十分沮喪，但比起你們，輸贏不算甚麼……因為你，我知道有很多事比足球更重要，那就是家人。我的目標不再是更多獎盃，而是與你們一起變老」。 作為男人，聽到都有點動容，何況佢太太!
泰萊
JACKY LAM. 字泰萊， 70後港人也。善長曝光捉影，喜歡咬文嚼字，嗜好諗嘢。細個嘅夢想係做電台DJ、記者、人像攝影師，點知全部實現晒! 現致力保育廣東話同令自己和身邊人身心康泰。
