上星期公司又裁員! 一位同我差不多十七年前一齊入職嘅經理喺上年疫情之後被總公司晉升為區域總經理，但不足一年之後公司又話生意達唔到上年定落嚟嘅營業額而要炒人，喺300個被裁員名單裏面呢一位總經理被送上豉椒魷魚一碟，聽到呢個消息之後不禁倒抽一口涼氣! 感嘆在加拿大工作真係冇乜人情味可言，經濟唔好公司要裁員，無論你係老臣子、高中層，都係最容易被裁走! 無面俾! 西方人有句說話:「No one is unreplaceable!」就算係呢間公司嘅CEO都可以被董事局踢你走，咁打工仔仲帶唔帶個心返工呢？
最近各大足球報章熱門話題就係剛剛奪得世界足球先生嘅阿根廷球王美斯未來嘅去向。佢遲遲未動筆續約大巴黎，令人揣測佢今年季尾約滿時可以選擇自由離開去另一個佢更加想享受足球嘅土地。好多球迷話佢依然心繫效力咗廿年嘅巴塞隆拿，亦有人話佢職業生涯裏面重來冇喺阿根廷嘅聯賽球隊上出一分力，有機會返佢嘅第一間母會紐維爾舊生隊作為佢足球生涯嘅總結。
當然更有可能嘅係去到邁阿密幫碧咸打工，姑勿論佢嘅去向係點，佢曾經喺一間球會效力咗20年都因為球會或者公司財政困難而將佢賣走，完全唔係因為佢嘅工作能力(入球能力) 又或者係同同事(其他球員) 夾唔夾得嚟…… 總之喺金錢掛帥嘅商業社會裏面佢就係要被犧牲嘅嗰隻棋子! 到呢一刻依然記得美斯喺宣佈離開巴塞隆拿記者會上面含住淚講出呢個消息嘅時候，真係聞者傷心，聽者流淚! 人生就係咁樣，你唔識「捨」何來有「得」呢! 美斯終於喺上年年尾嘅世界盃一嚐冠軍之味，或多或少都要多謝巴塞唔要佢，令佢有一種打爭氣波嘅感覺。
我成日都會諗，足球員呢一個工作真係一個好與別不同嘅職業。我哋喺電視上面睇嗰啲頂級聯賽嘅球員、球星喺場上拼搏，講緊周薪都可以幾十萬磅。但其實要做到成為職業足球員但又冇機會踢世界盃，又或者長期處於球隊後備席上受薪嘅球員嚟講，究竟呢個係一份筍工定係你都想喺工作上面能夠表現自己，發揮自己一技之長？我相信無論擺喺任何職業上面，如果能夠撇除人工嘅話，每個人都希望可以喺自己嘅職場上面發光發亮，哪怕你係一位清道夫，你都希望掃得條街乾乾淨淨，呢個係你嘅責任亦都係成功感，球場上嘅清道夫如是。曼聯嘅中堅，現在長期坐於冷板凳嘅麥龜隊長，如果佢能夠睇到我呢篇文章唔知佢會唔會有所領悟呢!
泰萊
JACKY LAM. 字泰萊， 70後港人也。善長曝光捉影，喜歡咬文嚼字，嗜好諗嘢。細個嘅夢想係做電台DJ、記者、人像攝影師，點知全部實現晒! 現致力保育廣東話同令自己和身邊人身心康泰。
